Thursday, February 01, 2007

ثلاث مقاطع من لحظات الغياب

أنا عشت في حياتي مليون لحظة وداع .. لدرجة اني ما بقيتش قادر أتخيل نفسي من غير محطة قطار أو أتوبيس أو عربية أجرة ..في كل مرة بسأل نفسي : ياتري هرجع ألاقي مين اتولد و مين غاب عن حياتي للأبد..و ف كل مرة بحبس دموعي وانا برمي نفسي على الكرسي و اسيب كتف الراكب اللي جنبي يستقبل سؤالي
..............................................................................................................
كل الفواتير اللي دفعت تمنها كان سببها قلبي .. قلبي الجبان اللي عمره ما وقف جنبي و لا ظبطته مرة بيحاسب نفسه على الكوابيس اللي سببهالي
المشكلة اني وقفت جنبه كتير في كل غرف الإنعاش اللي دخلها , و خرجته من معارك كتير بإصابات خفيفة رغم انه كان هيموت كذا مرة
ياترى ينفع أسيبه و أعيش من غيره ؟ و اللا هيفضل يطاردني زي الكلب الوفي في كل الشوارع الضلمة؟
...........................................................................................................
بعد كام شهر هكمل 30 سنة
ياااااااااه ..ده انا كبرت قوي ، و انا اللي كنت فاكر اني عمري ما هكبر زي كل الناس
خلاص بقى فيه ناس دلوقت بيقولولي ( يا أستاذ ) و كإنه شيء عادي ، و انا مقدرش اعترض
خايف قوي من اللحظة اللي هشوف فيها بنت جميلة في عربية مترو .. تبتسم لي بحنان ، و تقوم من مكانها و تقوللي : اتفضل اقعد يا عمو
..............................................................................................................

26 comments:

shaimaa said...

ابتسامة هادية اترسمت على وشى وانا فى اخر سطر


وداع .. وقلب متعب ..و خوف من الكبر
اشباح بتهاجم لما بنزهق او بنرهق


اول مرة اقرا لك حاجة كده
بس جميلة ومعبرة

abdallah ahmed , عبدالله احمد said...

يا طارق
حرام عليك و الله


ان شاء الله
حيظهر ف حياتك قريب حب جميل يغسل قلبك من الهموم و الذكريات


احنا لسة صغيرين و شباب زي الورد
وانا اسف ف كلمة الورد

وبعدين تولع بجاز و تمسك فيها الكهربا لحد ما تنور اللي تقولنا يا عمو ف يوم من الايام

انا بتجيلي كوابيس من الكلام ده
كفاية شجن و النبي

AZ said...

انا من كام سنه بطلت ابص لوشى فى المرايه عشان اما اكبر ووشى يكرمش تفضل صوره وشى فى عينيه من غير كرمشه

shaimaa said...

ماهو هوا دا التطور الطبيعي للحاجه الساقعه يا استاذ طارق
:D
واحنا اطفال بنبقي عاوزين نكبر علشان نبقي قد الناس الكبار ونقول كلام مجعلص محدش يفهمه علشان يقولو علينا عباقره واننا كبرنا خلاص وكل ما نكبر حبه بنخاف اننا نكبر اكتر ونقعد نفكر بعد كام سنه هنبقي ازاي ومين وفين
وبعدين كل مرحله وليها حلاوتها وجمالها زي ما بيقولو
مش لازم تكتئب دلوقتي لسه بدري علي الاكتئاب
:D

frozen love said...

مش مشكلة تكبر ولا تصغر..المشكلة يفضل قلبك شباااب

KING TOOOT said...

الوداع مش فراق لبيوت و ناس
الوداع مش بعاد جسم و خلاص
الوداع جوانا أقوى من كده
الوداع جوانا غربة في الأساس
وعجبي
_________________________
قلبي الجبان الخاين الندل الخسيس
كل مره بأندهه يبيعني برخيص
مع إني كنت بأحبه و أتمنى له خير
و كتير حميته مع أنه كان حايموت فطيص
وعجبي
_________________________
قربت خلاص و كمان كام شهر حاأكون ثلاثين
و لقيت العمر يعدي سنين و وراها سنين
من بعد ما كانوا يقولوا الواد بقيت استاذ
خايف قوي يوم اصحى ألاقيني معدّي الستين
وعجبي
_________________________
KING TOOOT

كراكيب نـهـى مـحمود said...

حلوة اوي يا طارق
فيها تامل غرقان في شجن
فيها رعب من الزمن اللي بيعدي بين ايدينا واحنا مش بنحس
عن ذلك القلب الذي سيظل يتبعك وفيا
اتبعه انت ايضا سيخرج بك من الكهف ويصل بك لضوء النهار

الوردة السوداء said...

كلنا هذا الرجل

الزرافة الحسودة said...

أنا أحسدك
أنا احسدك
أنا
أ
ح
س
د
ك

Anonymous said...

في ناس كتيير بتتمنى تكون مكانك خصوصا يبقى عمرها 30 على كل انا لسه عمري 20 بجد مش هزار مستعدة اتبرعلك بعمري كله ببلاش بس خليلي عشرة سنيين الجاية لحد 30 انت على فكرة مش خايف يبقى عمرك30 انت خايفة تيجي 30 والي بعديها وانت لسه وحدكااو تلاقي الي كنت بتدور عليه من سنين ويجي بعد فوات الميعاد ويعدي فيك العمر وانت زي ماانت ماتغيرت اي حاجة الا لون شعرك بس افتكر ربنا بخلينا ننتظر شوية وياخد من عمرنا سنين عشان في حاجات حلوةتانية مستنيانا الله اعلم إمتى نقابلها بس المهم انا نقابلها قبل فوات الاوان وماتخافش لسه شكلك شباب يامانس كتيير في 20 بتلاقي عندهم 30 او 40 سنة ياما ناس داخلة على30 بتحس انهم داخلة على 20 ربنا يوفقك ويعطيك الصحة والعافية

باسم شرف said...

حلوة يابني
انت ليه حزين وعينيك مدمعة
هههههههههههههههه

متزعلش من حد مينفعش تزعل منه
فهمت ياطارق يا امام

Mony The Angel said...

eh da ya atre2 da (esma7ly a2ollak tare2 mn 3'eer ostaaz ;)
don worry about the years..
and what will it affect in ur face
worry about wits effect on ur soul..
bgad al post helw awe, w a7'er satreen dool y3a2ado awe..
bas mai7'awfoosh :)
helw en yeegy yoom had yebtesemlak w y2oom 3shan enta to3od zay manta ebtasamt lenaas kteer w omt 3shan homa yo3odo :)
msh 3arfa a2ool eh tany..
bas seebak enta.. msh 7'las hatkamel 30 kaman kam shahr,
bas wala baien 3aleek ;)

makhlouf said...

ياعمو طارق
مفيش داعى للحزن ده
والتشاؤم
انا متأكد ان قلبك شباب
ياعمو

------------------
كتابة جميلة جا ياطروووق
-------------------------

Anonymous said...

بص يا ابيه طارق هي دي الدنياالانسان بيتولد ويكبر ويموت عادي
بس اللي مش عادي اني اموت من غير ماحد يعرفني
احييك علي احساسك ال جميل
احمد وائل

شيفورليه فرانسيه said...

كلام كله دراما و عبر يا أوساس خالد !

Mirage said...

جميلة قوى جملة باسم شرف

متزعلش من حد مينفعش تزعل منه


*
*
*

مش عارفة ليه اتفكرت أغنية مروان خورى .. دواير

جميلة .. زى المقاطع بتاعتك تمام

Baher said...

باين عليك واخد دور حزن بس يا عم طارق الحياة بتستمر وفى حاجة بتروح عشان حاجة تيجى وزى ما قال عمنا جاهين "يأسك وصبرك بين ايديك وانت حر , تيأس ما تيأس الحياة راح تمر , انا دقت من دة ومن دة لقيت الصبر مر وبرضك اليأس مر"و الحياة تستمر ياراجل

ME said...

انا فجأة إكتشفت إن العيال الصغيرة اللى اتولدت على ايديا و حضرت السبوع بتاعهم و مسكت الشمع مع العيال الباقية ... بقوا فى آخر سنة فى الجامعة!! عادى.. بس المهم إنى أنا من جوايا ماخدش بالى من الحاجات دى .. يعنى هيبقى هم من بره و من جوه .. خليك فريش يا طارق بيه .. و على رأى باسم اللى جملته واضح انها هتكون شعار الفترة القادمة "ماتزعلش من حد ماينفعش تزعل منه" .. و لو واحده قالت لك يا عمو مافيش مشكلة .. الاحترام حلو برضه .. وعلى فكرة أنا بيتقالى يا طنط من سنتين فاتوا :) .. ماتشيلش هم و عقبال 90 سنة مش 30 بس

Dananeer said...

تعرف يا طارق
مبعرفش اتخيل نفسى كبيره خالص
باحس انى مش حاكبر
مش عايزه اكبر
عايزه اموت و انا صغيره
رغم انى من جوايا باحس ان عندى مليون سنه

الوداع اكتر حاجه وحشه
مالهاش احتمال فعلا

الفواتير
بتوجع و بتعلمنا
يااه لو تقدر تسيبه و تسيب دماغك كمان
بس و بعدين

العمر
غصبن عنا بيعدى
حلو اننا بنسرق منه اوقات بنكون بقلوب اطفال و احاسيسهم

إيهــاب said...

طارق
من زمان بسأل نفسى سؤال ..اعيش مبسوط من غير ما حد يفتكرنى ولا كل
الناس تفتكرنى من غير ما اكون مبسوط
انت ايه رأيك ؟

we2am said...

:S

طارق إمام said...

شيماء
متشكر
هيه بس صادقة حبتين
...................................عبدالله
ازيك يا فناااااااااااااان
حياتى فيها حد فعلا يا معلم
و أظن انت عرف يابوالفن
..................................
az
أنا فعلا يا أمينه مش عارف أوصفك بإيه
كتلة مشاعر صادقة
ربنا ميحرمنيش
...................................
شيماء
مفيش اكتئاب و لا حاجه
صباح السعادة يا جميل
...................................
فروزن لاف
انت جبت المفيد يا معلم
...................................
كينج توت
قصيدة ممتعة و حساسة جدا كالعادة
و خطوة عزيزة جدا يارب تتكرر
...................................
نهى الجمييييييييلة
اديني ماشي وراه ياستي
يظهر انا اللي بقيت زي الكلب الوفي
(:
.................................
الوردة السودا
متشكر
ع التعليق
و ع الزيارة
...................................
الزرافة الحسودة
كتر الحسد هيخلي رقبتك قد السمسمة
ههههههههههههههه
...................................
المجهولة
انتي جميلة قويييييي
..................................

طارق إمام said...

باسم شرف
طبعا يا معلم
اشطة
................................
موني الملاك
ايه يا سيدي الكلام الجاند ده
الللللف شكر
..................................
مخلوف
لنت اللي جميل يا عمو مخلوف
(:
.................................
احمد وائل
متشكر
....................................ميراج
أنا كمان بحب الغنوة دي جدا
مصادفة غريبة
ذوقك كده يبقى حلو
..................................
باهر
كله تمام يا معلم
...................................

kareem said...

العزيز طارق

دي اول زيارة لمدونتك وجدت تعليق لك عند احد الاصدقاء

و جذبني هذا البوست
و فكرني بحالي ... نعم كلنا نكبر و نخشي مرور الوقت ... احساس مؤلم جدا

شعرت بهذا بالامس لن اسرد الموقف هنا
و لكن شعرت اننى كبرت و ان الوقت يمر و لن يرحمنا الزمن

المهم نلاقي حد يحبنا نكبر معاه و تجمهنا ذكريات سوا نفتكرها لما نكبر

عاوز اقولك سر
انا عندي احساس انى مش هكبر و انى هموت صغير مش عارف ليه
عموما عادي عادي

اتمني ان تقبلني صديق لك

كريم

طارق إمام said...

me
اللي انتي كاتباه مش مجرد تعليق
ده بوست موازي
حلو وعميق
سلامي
................................
دنانير
الملحوظة السابقة تنطبق برضه على كتابتك الجميلة
آسف لو كنت اتسببتلك في شوية شجن
................................
ايهاب
لا دي و لادي يا معلم
احب اكون مبسوط
و الناس فاكراني
..............................
وئام
(:
.................................
كريم
احنا خلاص بقينا اصحاب
ده شيء يشرفني يا كيمو
شفت بدلعك ازاي؟؟
نبقى اصحاب ولا لأ؟؟
(:

Moody said...

رد متأخر
و لسبب علمى هو ان البوست ده لما قريته لأول مره عمل عندى شبه شلل عقلى(بعد الشر عليا طبعا)او ببساطه خلى دماغى وقفت وما كنتش عارف اكتب كومنت بالرغم من ان البوسط جميل و جميل البوسط
------------بجد
المقطع الأول أثر فيا جدا
انت لخصت مشاعر ملايين من الناس اللى بتعيش لحظة وداع

المقطع التانى فيه جمله عجيبه اول مره اسمعها و لحد دلوقتى بستغرب انت جبتها ازاى:
هيفضل يطاردني زي الكلب الوفي في كل الشوارع الضلمة؟


انت مشكله, بجد انت لسه ماحصلتش