Friday, February 09, 2007

خمس حاجات

تنفيذا لأوامر صديقي محمود ، صاحب مدونة ( عالم مودي ) هرد على التاج المحرج المخجل القاسي اللي بعتهولي .. و أكشف عن خمس حاجات من عالمي السري ..

........................................................................................................
في طفولتي و حتى مطلع مراهقتي كنت لاعب كرة قدم لا يشق له غبار .. حريف بمعنى الكلمة ..و كنت بحلم طبعا بارتداء فانلة الأهلي العظيمة ، و رقم 14 تحديدا لأني كنت بحب( علاء ميهوب) جدااااا
لكن العلام و السجاير و أشياء أخرى أخرجتني من المستطيل الأخضرو قذفت بي في المستطيل الأسود لأصير كاتبا .. الحمد لله يا كابتن
..............................................................................................................
بكتب سيناريو فيلم روائي طويل ..و بحلم انتهي منه خلال كام شهر خصوصا ان فيه فرص لإنتاجه انشاءالله , و من ناحيه تانيه شغال ع الهادي في مشروع ( جرافيك نوفيل ) مع رسام مهم
..............................................................................................................

وانا في الكلية ( كنت ف آداب قسم انجليزي ) حليت مرة امتحان مادة الفرنساوي _ اللي كنا بندرسها كمادة تانية _بالانجليزي ، طبعا دي كانت قمة البلطجة ..كنت في سنة 3 و اكتشفت ان المعيدة، اللي كانت بتستلطفني حبتين، نجحتني بدون وجه حق .. لكنها حذرتني لو كررت ده في سنة 4 هتسقطني في مادتها .. و بكل بجاحة عملت انا نفس الشيء في 4 ..و بكل رقة نجحتني المعيدة في مادتها ، للمرة التانية على التوالي ، بدون وجه حق
...............................................................................................................
يوم ما فزت بجايزة وزارة الثقافة الأدبية ..( أحمد العايدي) جاب لي هدية ما قلتش لحد هيه ايه .. الهدية كانت قلم ( باركر) قيم جدا ، و دي فرصة اني أشكر العايدي مرة تانية بما اني فتشت السر
.................................................................................................................
لما فسخت خطوبتي من حوالي سنتين وقفت على كوبري قصر النيل و طوحت الدبلة في النيل بكل قوة، علشان ميبقاش فيه أي فرصة اني ألبسها تاني
و قررت ان المرة الجاية لازم تكون دبلتي دهب .. مش فضة



.............................................................................................................

19 comments:

Anonymous said...

اولا انا فرحان اني اول واحد يعلق علي الخمس اسرار اللي انت كتبتهم يا طارق
ثانيا ربنا يوفقك في فيلمك الروائي اللي انت بتكتبه
ثالثا انا مستني الكتاب الي انت قولت حاتديهولي
احمد وائل

تسـنيم said...

إشمعنى هتجيبها دهب مش فضة..
هو الذهب بيظل للأبد لكن الفضة بتبلى؟؟؟

shaimaa said...

عجبتنى الهدية بتاعت العايدى
هدية ميقدش قيمتها اللى ناس شكل بعض
:)

والنيل دايما آخاذ و بيستحمل

we2am said...

والله انا باجي البلوج بيعجبني كل حاجة فيه :)
مم..الكورة كانت هتحرمنا من ابداعك الحمدلله يا شيخ :D
العايدي جايب بتاع غالي كده ليه؟ :S :P
مم..الدبلة يا قاسي القلب!! :S
انت اكيد أدري انت عملت كده ليه..بلاش حشرية بقي :D

shaimaa said...

غلطانه المعيده كان المفروض انها تنجحك من غير ما تدخل الامتحان خالص

:D

كلنا بنرمي في النيل حاجات بتبقي غاليه علينا في وقت وبعدين بتبقي عامله زي النار ولازم تترمي
والا هتحرقنا بذكرياتها

Baher said...

كويس انك قدرت ترمى الدبلة احسن حاجة انك تقطع على نفسك خط الرجعة بس حتى لو كانت الدبلة دهب كنت برضة هاترميها لأنه مش مهم الدبلة شكلها اية المهم هى عليها اسم مين؟؟؟
مبروك على الفيلم والقلم وباقى الحاجات

رانيا said...

اولا نشكر السجاير و العلام اللى بعدك عن الكورة و بلاش نجيب سيرة لاعيبة الكورة أحسن

النيل عندكو زى البحر عندنا حمّال أسية و قلبه كبير و بيشيل كتييييير

مش هتفرق دبلة دهب و لا فضة و لا حديد و لا حتى خيش
قيمة الدبلة دى هتكون فى اعلان ارتباطك بمين !!!!!!

ان شاء الله تكون دبلة وراها كل خير

LANKASH said...

انا متخيل يا طارق ان في سنة 2389
علماء الاثار هيكتشفو دبل كتير في النيل بس دبلتك هتكون الاشهر و هيكتبو في الاهرام الالكتتتوني
الجريدة المستقبلية يعني
اكتشاف دبلة للكاتب القدير و الكبير طارق امام و تعود لعام 1999
هيعرفوها ازاي معرفش بقة اكيد
في جهاز هيخترعوة مخصوص للحالات اللي زي دي
2389 بقة

Moody said...

مش معقول!اخيرا رديت...المفاجأه بجد انك كنت تلعب كوره,كنت فاكرك عايز تغنى

طارق إمام said...

احمد وائل
ربنا يخليك
...................................
تسنيم
هجيبها دهب لأن الدهب غالي
و الجملة عموما ماكانش المقصود بيها المعنى المادي
...................................
شيماء العزيزة
العايدي فعلا جميل دايما
عجباني عبارتك عن النيل
بنطوح فيه كل أخطاءنا و بيقبلها بتسامح
...................................
وئام الشقية
ازيك
العايدي حبيبي طبعا
و الدبلة دلوقت تايهة فى حتة بعيدة
أو يمكن تكون نامت للأبد في بطن سمكة قرش
خلينا ف بكرة
..................................
شيماء
(:
فعلا معيدة قاسية قوي
ههههههههههههه
الله على عبارتك عن النيل
كنت عايز اقولها و مقدرتش
جميلة و معبرة
..................................
باهر
الله يبارك فيك يا فنان
عايزين نشوفك بقى بطل تقل
انشاء الله الدبلة اللي جايه هيكون عليها أغلى و أطهر اسم في الدنيا
..................................
هشام رحمة
هشووووووووووووووووم الفنان
مش هقولك بعمل جرافيك نوفيل مع مين
ههههههههههههههه
بالنسبه لموضوع الدبلة خيالك كوميكاوي رهيب
قشطة
...............................
رانيا
أهلا بزيارتك
واضح انك ساحلية
عموما البحر و النيل اخوات
و معاكي حق طبعا
انشاء الله بكرة أجمل
ما تقطعيش الزيارة
................................
موودي
احنا تحت الأمر يا حودة
على فكرة انت عبقري تصوير
اديك دخلت غرفة الأسرار يا معلم
شفتني و انا كروي؟؟
محبتي
(:

ME said...

"وقررت المرة الجاية دبلتى تكون دهب مش فضة" ... جامدة موت ... عموماً ربنا يرزقك "بدبلة" ألماظ ;).. بس تعزمنى بقى .. تحياتى

esraa said...

يعني انت السبب ان مصر ماتوصلش كأس العالم, ينفع كده, تحرم الدوله من موهبه زي موهبتك كنا معلقين عليها الأمال؟
ربنا يوفقك في فيلمك, ومبروك علي القلم (:
أكيد مش أي حد يجيب هديه كده
وان شاء الله الدبله الجايه مش هتقلعها خالص

Anonymous said...

على فكرة الكورة مااختلفتش كتيير عن الكتابة كله بيلعب بس بطريقته الي برجله والي بقلمه بس اللون الاسود بيفضل ليه سحره على الاخضر بس انا خايفة تكون عروس النيل لاقت الدبلة ولبستها تبقى مشكلة والسجاير مش وحشة قوي زي العلم بس صحتك اهم خلي بالك منها ويريت قلم الباركر يكتب احلى ذكريات حياتك ويكون قلم حظ عليك ربنا يوفقك وعلى الفكرة يمكن الذهب أغلى من الفضة بس لون الفضة احلى من الذهب والايدين الي بتلبسها بتديها قيمة حتى لو كانت حديد ده مش فلسفة ده هو الحقيقة ربنا يوفقك يحبب ويحنن كل من شافك او سمعلك سلام

ReligionSword9ٌ said...

السلام عليكم ورحمة الله وبركاته..
أخيرًا.. ها هو الكاتب الموهوب الذي ظللت أتقصاه وأغوص وراءه في نصوص "كائنات تعرفها الأشباح" و"الإسكافي ذو النعلين المجنحين" و "بيت الشاعر" و"آخر نص في الأهرام لا أتذكر عنوانه -بتاع المانيكانات والبحارة ده-!" وكُتب "شريعة القطة" و"شارع آخر لكائن" -لم أحب الأخير بالمناسبة-, وأيضًا لم أجد "طيور جديدة لم يفسدها الهواء" للأسف..
المهم أنني كنت أعتقدك فوق الأربعين أو تحته بقليل.. فإذا بك شابًا.. يكبرني بعام واحد!.. وصديقًا لصديق -أحمد العايدي-!!
المهم.. أشكر الصديقة العزيزة (سارة) لوصولي البلوج عن طريقها.. وأسأل المبدع(طارق إمام) عن قصص "كائنات تعرفها الأشباح" و"بيت الشاعر" و"نص الأهرام الأخير" هل ستكون في المجموعة الجديدة: "غرف القباطنة لا ترى البحر"؟ وسؤال آخر: كيف يمكن الحصول على مجموعة: "ليلة الماريونيت" و"صورة جماعية للقتلة" -على ما أتذكر- إن كانت قد صدرت فعلاً؟..
وشكرًا..
حسام عبد الباسط

AZ said...

اغلب الظن العايدى هيكتب فى مذكراته انه شربنى حاجه اصفره عشان يسترد منى القلم اللى انا اخدته منك بعد ماشربتك حاجه اصفره بعد انت مااخدته منه بعد ماشربته حاجه اصفره... شكلنا كده هنقضيها جنزبيل بسبب القلم

قنديل ان شاء الله said...

أكن بقى البتاعة اللى وقفت فى زورى و أنا باشرب امبارح من الحنفية دى الدبلة بتاعتك .. يا أستاذ .. طارق مش كدة .. النيل ملك لنا جميعا !!

بس موضوع الكورة ده لازم نتاكد منه ان شاء الله قريب ننزل الفسحاية و نشوف ..
برجاء غلق الصنبور قبل استخدامه و شكرا !!

طارق إمام said...

me
العزيزة
طبعا معزومة بس تعملي حسابك في دستة جاتوه
ههههههههههه
شكرا يا مي
..................................
اسراء
انا سبت المنتخب أمانه في رقبة زميل الملاعب حسن شحاتة
و في ولد جديد أنا اكتشفته قبل اعتزالي اسمه أحمد حسام ميدو
ربنا معاه
دعواتك ليا في الفيلم
و القلم طبعا أجمل هدية
والدبلة الجايه انشاءالله تكون الأخيرة
..................................
المجهولة الجميلة
كلام جميل
اشكرك طبعا
بس ليه ما قلتيش اسمك؟؟؟
..................................
az
لخبطتيني يا أمينه
هوه انا ناقص؟؟؟
ههههههههههههه
صباح الخيرات يا صاحبة الأحلام القرمزية
................................
قنديل انشاءالله
وقفت في زورك عقربة
انشاء الله هفتح بطنك و اطلع منها الدبلة عشان ارميها تاني
هههههههههههههههه
بالنسبة للكورة يكفي اقولك اني كنت هحترف في نادي (كفر الشيخ يونايتد) بتاعكو
واسأل كابتن دسوقي

طارق إمام said...

حسام عبد الباسط
رد خاص جدا
متشكر جدا جدا على كل الإهتمام ده يا حسام
ياريت نتقابل قريب
بالمناسبه في واحد سافل استغل سهوي امبارح و رد عليك بإسمي بشكل حقير و منحط
انا عملت ديليت سريع لتعليقه
اشكرك من جديد
و اسمحلي نكون اصحاب

هبه said...

بس مياه النيل دى بعد كدا بتجيلك فى الحنفيه يعنى الاحسن المره الجايه يبقى ارميها فى الصحراء ولا اقولك هى مش هتفرق يعنى هى الدبله يعنى هى اللى هتفكرك .... بس بلاش دهب