Thursday, August 30, 2007

المسافة









قررت أعمل الإختبار على أربعة من أعز أصدقائي هم نائل الطوخي و أحمد العايدي و محمد حماد و باسم شرف، أنا دلوقت بتكلم عن المسافة بين الصورة الفنية ـ و طبعا واضح ان الأربع صور فيهم قصدية التصوير ـ و الوجه الحقيقي بانفعالاته . اللي خلاني أفكر في ده موقف قابلته من كام يوم على قهوة التكعيبة ، واحد يعرفني إسماً ، و علاقته بشكلي مبنية على صورتي في البلوج . طول ماهو قاعد معايا كان بيتأمل وشي .. و فجأة قاللي : انت أبسط من صورتك بكتير . سألته يقصد ايه فقاللي ان الصورة توحي بحاجات مش في شخصيتي .. فقعدت اكلمه في الموضوع اللي بكتبه دلوقت . بعد شوية جه باسم و حماد و العايدي .. و لاحظت انه بيتأملهم بنفس الطريقة .. كان مستغرب من الناس اللي قاعدة ،بتنكت و ترمي افيهات رغم انهم في الصور بلا ابتسامات و مايبانش عليهم خفة الدم
الصورة بتشكل صورتنا عند الناس ..و صورتهم عندنا .. و للأسف ، مش كل واحد بتيجي فرصة انك تقابله علشان يتأكد من المسافة الضرورية دي.. و بتفضل فكرة ناس كتير عنك هي الكارت المتقن ، اللي انت فيه ظابط انفعالاتك ، و محدد زاوية الكاميرا ، و شكل النور و الضل على ملامحك ، و تعبيرك المحايد .. كإنك في لاوعيك مش عايز الناس تعرف انت مين .. عايز تحافظ على مساحة الحياد الضرورية اللي تحميك من المتطفلين و اللي تخليك عايش جوة صَدَفة رقيقة صعب عيون الناس تعرف عن اللي جواها شيء غير اللي انت عايزهم يعرفوه

22 comments:

fawest said...

ممكن تكون بتكلم على حتى لو لم تقصد
طريقة سلامك على و اصرارك على الجلوس معك فى اول مرة ادهشنى حقا لسبب هقولة فى الاخر
و كمان عرضك مساعدتى توقعت حد يقولك بعد ما انا مشيت "اية يا عم اللى بتعملة دة انت تعرفة منين هتفضل طول عمرك تساعد كل الناس كدة انت عبيط"
ممكن يكون محدش قال كدة
بس الجميل غير الصورة و هو دة السبب
عرفنا بعض من كتابتنا
حاجة كدة زة متابع مقالات صحفى بتحبة فى كل مكان
بس احنا اكثر حميمية على المدونات
دى حاجة جديدة و جميلة وانا مستمتع بيها








بالمناسبة نائل فى الصورة قاعد كأنة................
فى اخبار الادب
مش كدة!!!!!!!!!!

Dananeer said...

الهنود الحمر كانوا بيعتقدوا ان الصوره بتسرق حته من روحك

الفكره دى كانت عجبانى اوى
لقيتها الاجابه المنطقيه لعدم حبى للتصوير و شكلى العجيب اللى بيجمع ما بين حزن انسان آلى او انسان فقد السيطره على تعابيره
فبيحاول يجمدها

رغم انى باحب القط
الصور و المواقف حوايا اوى

يمكن عشان كده بنظهر بالشكل ده
عشان مش عايزين ندى الاغراب و الصوره حته من جوانا
حته من روحنا

جميل يا طارق
كل سنه و انت أسد متأخره

AZ said...

lollll
ma3ak 7a2 shaklohom fi l sowar afandeya heheehheeeee

دينا فهمي said...

يا دماغك يا طارق

Anonymous said...

عارف المشكلة في الصور دي أيه ، أن كل واحد متصور فيها باعتباره عم النجم أو المُنظر وهو أبسط من كدا بكتير ، يعني في رأيي أحلى صورة بجد اللي كنت واخدها مع صحابك ساعة الاحتفال بالجايزة اللي اخدتاها يا طارق كلكم كانت تعبيراتكم بسيطة ومواجهين الكاميرا بعينكم مش زي الصور دي اللي كل واحد فيها عامل بروفايل - شعر والا دقن يا أستاذ - حكاية المسافة والصدفة أمر مخادع في الحقيقة ممكن نقوله على صحفي بيكتب مقال يومي فالناس بتحتفظ بنفس الصورة لنفس الشخص بينما هو بيتغير وبيكبر وبيكتب وبيكدب لكن زي ما انت عارف الصورة بتثبت لحظة معينة قد يكون - وأشك في هذا - نزل سهم الله أو "الوحل" على الواحد فيكو ساعة لقط الصورة فعشان كده طالعين بالمناظر دي
قشطة يا معلم

mahmoud said...

على فكرة
سبب انى مبعرفش اصور ناس كتير و من ضمنهم حضرتك انه عارف شكله و حافظه كويس و عارف يبص ازاى و يعوج رقبتة بزاوية كام درجة و كيت و كيت
طبعاً الوقوف قدام الكاميرا دى ملكة مابقولش حاجة بس انت لازم تقف قدام الكاميرا و كأنها عين تالتة ف راس المصوراتى، الصورة بتوريك انت ايه فى معظم الوقت اللى بتكون فيه على طبيعتك و بتوريك شكلك فى عيون الناس، هاقولك ايه و لا ايه التصوير ده اصلا خلانى عامل زى جدو...بخرف
مش هنعمل المدينة بقى؟؟

إبراهيم السيد said...

لم أعرف أبدا لماذا لا أحب شكلي في الصور دائما يكون القناع أو القشرة غير محكم ، معوج قليلا

أخيرا أظن أنني عرفت السبب
روحي شاحبة ، حتي أنها لا تبدو في الصور

:)


موضوع حلو جدا

fawest said...

باللمناسبة
انا علرف انك ميتكلمش على
يس قلت انكشك علشان اكتب الكلمتين دول
شفت صورة ناغئل و احمد ناجى فى البديل لمبارح
هم الاثنين بسجايلر و متقابلين
هل هناك معنى للتنافس يعنى
ممكن و ممكن انا بخلرف
بس شوف الصورة بتعمل إية

محمد عز الدين said...

بوست جميل جدا يا طارق باشا
بجد موضوع محتاج تفكير
أنا عن نفسي ما بحبش اتصور اصلا
ما اعرفش ليه
بس ع العموم الشاب اللي كان قاعد معاكو عنده حق
انت فعلا شخصية بسيطة بعمقها
وتستحق ان الواحد يقرب منك ويعرفك
تحياتي

virginia said...

Ahmed El-Aidi is a goddamn hot

Mony The Angel said...

wow bgad :))

alfekra gamda awe

aked sa7 alnas ally msh photogenic zaiee :cute: bi3aano mn alproblem da lol

bas enta photogenic ya tare2 malak bas :D

تــسنيـم said...
This comment has been removed by the author.
كريم بهي said...

استاذى الجميل الحلويه
انا عن نفسى بشوفك فى كلامك والكلام اللى بيقولوه عليك
الصورة دى اخر حاجة كنت بشوفها فيك
اللى بيكتب مش صورتك
القاص مش صورتك
دى مجرد ايقونة بتعبر عنك وبس
ممكن يكون لها معنى وتأثير لكن الاهم الروح والقلب والعقل
المسافة مش بعيدة لو قسناها من عند التلات حاجات دوووول

موضوع جميل جداا وعنوانه احلى

ربنا يكتر من معجبينك ويتأملوا فيك كمان وكمان

كريم بهي

طارق إمام said...

فاوست
ازيك
ما كنتش اقصدك تحديدا
أنا بس لقيته مدخل مناسب للكتابة عن فكرة شاغلاني
و بالنسبة لنائل هو فعلا قاعد في أخبار الأدب
(:
..................................
دنانير
وانتي طيبة يا فنانة
فينك من زمااان؟
تعليقك هايل
و الجزئية الخاصة بالهنود الحمر عبقرية
أشكرك على نصك الموازي
................................
az
(:
..................................
امرأة تقول الذي لا يقال
ربنا يخليييكي
..................................
المجهول
قشطة
و أنا بحترم وجهة نظرك تماما حتى لو كنت مختلف مع جزء منها
.................................
مودي آلان
أنا مش قدك يا عم في موضوع التصوير ده
انت شيطان فوتوغرافيا
و طبعا هنعمل المدينة
و الأسبوع ده ايه رأيك بقى؟؟؟؟؟؟؟؟؟

طارق إمام said...

سيد العارفين
ازيك يابو خليل؟
اسمحلي أعتبر تعليقك البديع قصيدة قصيرة
(روحي شاحبة ، حتى أنها لا تبدو في الصور ) أشكرك على هذه القراءة الكثيفة الجميلة
عقبال كده ما نعمل قراءة في ديوانك الجميل
...................................
فاوست تاني مرة
عارف انك بتنكشني
(:
طبعا مفيش تنافس
لإن نائل الطوخي مالوش منافس في الكتابة
................................
محمد عز الدين
يا عم كدة كتييييير عليا قوي
ربنا يخليك يا عز
يا من تملك قدرا وافرا من اسمك الجميل
عايزين نتقابل بقى
و لاحظ اننا لسه ما تكلمناش عن ديوانك
(:
...................................
فرجينيا
أحمد العايدي حالة خاصة و فريدة
كإنسان
و ككاتب
و كصديق
..................................

طارق إمام said...

موني
انا متأكد انك فوتوجينيك جدا
مش عارف ليه
وانا طبعا فوتوجينيك0(:
مفيش مشكلة
شكرا على تعليقاتك الجميلة
يا ملاك
..................................
كريم بهي
متشكر جدا جدا
و انشاء الله نتقابل قريب
و نقرب من بعض انسانيا

nael eltoukhy said...

يا طارق مش ملاحظ انك مدلعني على الاخر،
وانت عارف ان اي كاتب بقامتك لما يتكلم عن اي حد بالطريقة الحلوة دي دا بيبقى بيبرر له انه يتدلع ويتغر ف نفسه ومحدش يعرف يكلمه
بمعنى اخر. انت مفسد جميل يا طارق

:)

وابقى اسال عليا يا ندل انا بقالي تلات تيام عيان وباموت في البيت

fawest said...

اختى جت من السفر بالكتاب
و اسف ىا طارق
انا اتبريت منك امامها
ى بحاول اقرأة

AZ said...

اه نائل عيان وبقاله تلات ايام بيتعالج على الفيس بوك نياهاهاهاها
الف سلامه يا وحش :) انشالله الناس الوحشه هع هع هع

طارق إمام said...

نائل
الف مليون سلامة يا حبيبي
دي العين صابتك لكن رب العرش نجاك و الحمد لله
و بعدين يعني لو ما دلعتكش أدلع مين؟
هنتقابل فورا طبعا
(:
...................................
فاوست
طمنتني يا طه
ربنا يطمن قلبك
اعتذر لأختك بالنيابة عني
(,,
..................................

AZ said...

نائل طلع طريح الفراش فعلا مش مجرد مرض تكتيكى

Anonymous said...

أولاً يا طارق كل سنة وانت طيب
غريبة إني أقابل البوست ده في الوقت ده، لإني امبارح بس كنت بفكر في السبب ورا إني مبحبش اتصور خالص، لإني بحس إن الصور بتختزل البنيءادم في لقطة واحدة جامدة، بتجيب جزء صغير جداً من الحقيقة، ده إذا كان فيها شئ حقيقي أصلاً..
بس واضح يا طارق برغم كل الكلام الجامد اللي انت قلته ده، إلا إنك مصمم تفضل محتفظ بالصدفة اللي مغطياك مع إني حاسة إن تحت الصدفة حاجات أحلى بكتير من شعرك :)