Monday, January 19, 2009

الأرملة دخلت المطبعة برجليها ((:

امبارح دخلت روايتي الجديدة " الأرملة تكتب الخطابات سراً " المطبعة .. أخيراً ، و بعد ما أخرت البروفة النهائية عندي أكتر من أسبوعين لمراجعتها ..و بعد لحظات القلق الأخيرة اللي دايما تنتابني لما بحس ان الكتاب خلاص .. هيتطبع بحق و حقيق .. و هيبقى بعد أيام ملك للدنيا كلها مش ليا لوحدي .. صدقوني لحظة صعبة و انا بودع الكتاب بيقين انه خلاص .. خرج من تحت إيدي و هيبدأ يعيش خارج سلطتي .. شعور هو مزيج من الفرحة و الترقب و القلق و الخوف .. نشوة نشر الرواية جت بالتزامن مع نشوة الحصول على جايزة ساويرس .. فرحتين في الراس توجع يا جماعة (: اتلهيت بالجايزة شوية عن البروفة اللي نايمة في حضني بقالها أيام .. و كل شوية أراجعها من جديد علشان اتطمن .. و كمان جت الجايزة علشان تبقى المسئولية مضاعفة .. بس أخيرا .. سبت " الأرملة " تتوجه للمطبعة برجليها علشان تكون موجودة بعد أيام قليلة في معرض الكتاب ، بين الإصدارات الجميلة و المهمة لدار العين . لما دخلت الدار امبارح ، علشان ألقي النظرة الأخيرة على الرواية قبل ماتروح المطبعة .. سألت على الدكتورة فاطمة البودي ــ الصديقة الكبيرة و صاحبة الدار المحترمة ــ و اندهشت لما عرفت انها مش موجودة ..
سبب دهشتي اني لقيت كل واحد قاعد على مكتبة ، حالة صمت مقدس خلقها انهماك الجميع في الشغل .. و دي حالة يندر أن تتواجد في مصر في غياب صاحب العمل ، و أحيانا في وجوده والله !! كل واحد قاعد بيعمل شغله بتركيز .. فعلا سياق مؤسسي محترم .. المهام موزعة بعناية .. كل فرد له شغلة محددة موجود علشان يعملها على أفضل وجه .. سلاسة شديدة في كل شيء .. واحترام حقيقي للكاتب و إدراك لأهميته .. دقايق قليلة كنت قاعد و قدامي " الكلك " اللي هو المرحلة النهائية للنص قبل الطباعة .. راجعته .. فاستلمه شخص مني و نزل بيه فورا للمطبعة ..بجد حاجة تفرح .. قلت للدكتورة فاطمة بعدها و انا بكلمها في التليفون : أنا حاسس اني بنشر في أوروبا .. فردت بجمالها الدائم : والله يا طارق نقدر نبقى أحسن لو كل واحد عمل شغله بضمير .. يمكن علشان كدة اتحولت العين لدار مهمة تحظى باحترام كتابها و قراءها في سنوات قليلة .. في الدار الكل يدرك مهمته .. عارف ــ المدير التنفيذي النشط الذي يعمل بدقة .. ووجدي الكومي .. الروائي الجميل صاحب رواية " شديد البرودة ليلا " و القادر على الفصل بذكاء و سلاسة بين كونه روائيا ينشر أعماله في الدار و بين كونه يعمل في الدار ضمن إطار وظيفي .. بحيث لا يجور الموظف على الكاتب فيفقده خصوصيته و استقلاله و لا يفقد الكاتب نفسه بدعوى الحفاظ على وظيفته و أكل عيشه.. هذا الخلط نجا منه وجدي بذكاء فاكتسب احترامي مبدعاً و واحدا من العاملين في الدار .. حالة بجد مشرقة .. الكل يعمل طوال الوقت و الكل سعيد .. ناهيك عن الهدوء الجميل رغم أن الدار تقع على كورنيش نيل القاهرة الصاخب
امبارح كان يوم جميل بجد ..رغم ان الأرملة سابتني وراحت المطبعة ..أنا في الانتظار .. و سعيد لإن كتابي الجديد هيظهر ضمن سياق احترافي مؤسسي محترم ، بين أفضل كتاب مصر و الوطن العربي .. مع ناشرة مثقفة بقدر فاطمة البودي .. و اسم بحجم دار العين
(: ..

18 comments:

Anonymous said...

u deserve all this joy..rbna ydeem 3lek elfar7a :)

عاشقة القمر said...

مبروك يا جميل دخول الأرملة للمطبعة وعقبال خروجها لإيدينا سريعا
كل سنة في الوقت ده كنت ببقى متشوقة لمعرض الكتاب جدا .. السنة دي بقى الشوق عندي شوقين شوق لمعرض الكتاب وشوق اكبر لروايتك الجديدة
:)

!!! عارفة ... مش عارف ليه said...

الف مبروك

والاجمل هو توثيقك لهذه اللحظات

إنها لحظات ... المخاض


والف مبروك مرة تانية :)
وليد

Anonymous said...

Mabrook ya tarik, kwayes 2awi enak la2eet nasher gdeed monaseb l7agmak el 7a2ee2i ;)

إبـراهيم ... said...

ألف مبروك يا باشا ....


مرتين (ثلاثة)، وفي انتظـار نسخـة

بإهـدائك الجميــــــل



وعقبال الأعمال الكـاملة :)

شادي أصلان said...

مبروك عليك دار عين ومبروك علينا الأرملة

عقبال ما تشوفها عروسة تاني يامعلم

mostafa rayan said...

مبروك الكتاب ياطارق
ويارب ينجح زي هدوء القتلة واكتر

طارق إمام said...

نوستالجيا
ربنا يخليكي
(:
ــــــــــــــــــــــــــ
عاشقة القمر
أشكرك على جمالك
و يارب الرواية تكون عند حسن ظنك
(:
ـــــــــــــــــــــــــــ
وليد
الله يبارك فيك
و فعلا اللحظات دي مهمة رغم انها تبدو بسيطة
كل الشكر
(:

طارق إمام said...

anonymous
متشكر جدا جدا
و فعلا دار العين مكان محترم يشرف أي شخص بالنشر فيه
ــــــــــــــــــــــــــــ
إبراهيم
أبو خلييييييل
الله يبارك فيك
نسختك محفوظة
(:

طارق إمام said...

شادي أصلان الجميل
الله يبارك فيك يا أخي الحقيقي و ابن أبي
يالله بقى شد حيلك عاوز اباركلك على كتابك
(:

طارق إمام said...

مصطفى ريان

الله يبارك فيك يا جميل
كل الشكر
و يارب يكون عند حسن ظنك انت و جميع الأحبة

wafaa said...

مبروك عليك انت خلصت من الارملة
ومبروك علينا الارملة
ويارب افهمها من اول مرة مش زي هدوء القتلة اللى جننتنى
ربنا يوفقك يا طارق

Anonymous said...

ألف ألف مبروك يا طارق
على الفوز , وعلى صدور الرواية الجديدة
أنا قريت الرواية بجد , بجد انت بتكتب من منطقة شديدة الجمال
تحياتى لك
وبانتظار الرواية الجديدة ..

اسلام محمد ابراهيم محمد الديهي said...

كان نفسي اكون اول حد يهنيك بس يا سيدي حبيبك كتير ..الف مبروك ع الرواية انا مش بقولها ليك انا بقولها لنفسي لأني هأقرا حاجة جديدة عليها توقيعك..مناسبة جديدة تستدعي الاحتفال
وعامة الف مبروك

دعاء مواجهات said...

الكاتب الحقيقى

هو ذلك الذى لا تمر علية الحظات هكذا دونما توثيق وتدقيق ووقوف غير عادى

اهتماماك بكل تفاصيل القصة ومراحل انتاجها بيدل فقط على مدة حقيقيتك وحبك لقلمك

ومازلت اتحرق شوقا ً لقراءتها ..

Ahmed Mohamed said...

مبروك يا طارق ع الجائزه
انا بحبك جدا ويارب تتبقي زي ما تحب
مبروك كمان تلاتاشر اربعتاشر خمشاشر مره
ههههه

Anonymous said...

الإبداع الحقيقي حري ٌبالتعبير عن ذاته ، والفكر الإنساني لم يخلق ليختنق في ظلام الصدور، والمبدع الحقيقي يمتلك دوماً الحق المطلق في أن تجد أعماله طريقها للنور باعتبارها خلاصة تجربة إنسانية كاملة تستحق النشر .
من هذا المنطلق تعمل دار رواية للنشر الإلكتروني على إفراد مساحة كاملة للنشر لكافة مبدعي الشبكة العنكبوتية بإعتبارها الخطوة الأولي نحو النشر الورقي، وفي سبيل الحلم في أن يصل إنتاجك للجميع تتعهد الدار خدمة النشر الإلكتروني على موقعنا أولاً بصورة تليق بالأعمال مع توفير الدعاية اللازمة والمناسبة له على الشبكة على كافة المستويات ثم تقديم ما يصلح منها لدور النشر المختلفة شرط أن يكون حجم هذه الأعمال صالحاً للنشر الورقي .
بدايتنا هي الحلم المشترك ودافعنا للاستمرار هو الأعمال المميزة من أجل أن نحقق معاً توازناً للنشر الإلكتروني والورقي ... الجديد عندنا هو اختيار أفضل عمل سنوي يصل إلينا كل عام من خلال لجنة تنعقد لذلك وتعتمد في اختيارها في الأساس على استقراء القبول الذي لاقاه العمل المختار لنشره بصفة سنوية في معرض الكتاب مع التزام الدار بتكليف نشره وعمل الدعاية اللازمة له كاملة و بصورة مرضية لصاحبه .
يبقى أن ننوه أننا لن نخضع لشروط النشر المعتاد وتعسف دور النشر التقليدية و يكفي فقط أن يمثل عملك تياراً أدبياً ناضجاً سواء أكان العمل في صورة رواية أو ديوان شعر أو مجموعة قصصية .


موقعنا ( http://rewaya.tk )


إيميلاتنا
rewaya12@hotmail.com
rewaya12@yahoo.com

Entrümpelung wien said...

Dank den Themen .... Ich hoffe, mehr von den Themen