Friday, March 30, 2007

كتابة جديدة




انا انهارده فرحان .. لإن فيه جيل جديد من الكتاب قدمتهم جريدة أخبار الأدب في ملف خاص و جميل . مجموعة من الكتاب بتستقبل الحياة الثقافية أعمالهم الأولى : فرحان بباسم شرف و محمد الكفراوي , فرحان بمحمد الفخراني و محمد صلاح العزب .. و فرحان أكتر اني واحد من اللي ساهموا في الملف بتقديم دراسة نقدية عن ديوان محمد الكفراوي الأول , و البديع ( حلم وردي يرفع الرأس ) واللي ليها مذاق مختلف بالنسبالي عن كل الدراسات اللي كتبتها قبل كده .. إني أكون واحد من اللي بيقدمو الكتابة دي للناس و يمهدولها علشان تاخد نصيبها من القراءة و الانتشار بين القراء ..... و ما انكرش اني كنت احب أكتب عن ناس تانية في الملف زي باسم شرف .. ماانكرش اني فوجئت برواية مسعد أبو فجر : طلعة البدن اللي صدرت عن دار ميريت و بعتبرها رواية العام في الكتابة الجديدة و قررت اكتب عنها قريب ، و بتمنى تاخد حقها خصوصا ان صاحبها مش قاهري و لا من سكان القاهرة ، .. يعني ما يقدرش يخللي الناس تشوفه إلا من خلال إبداعه بس


أنا مش من عادتي في البلوج أتكلم عن الحياة الثقافية كتير و لا عن همومي و مشاغلي و نشاطي فيها .. لكن شايف ان من واجبي انهارده أدعو كل المهتمين بالأدب لقراءة هذا الملف المهم .. علشان يتعرفو على كتابة جديدة بتتولد في مصر .. و مش هقول ان الناس هتشوف عباقرة ، لكن هتشوف محاولات تستحق التفاف الجميع حولها، و من خلال الحوارات و الدراسات النقدية بتتكشف جوانب مهمة مش هتكتمل إلا بقراية أعمال أصحابها .. لأني متفق تماما مع صديقتي الكاتبة المبدعة منصورة عز الدين ، اللي أشرفت على الملف اللي احتضنه ( بستان الكتب ) ، و كتبت في تقديمها الموضوعي المحب و المهم ليه : هذه الأصوات تقدم نفسها _ بشكل أو بآخر _ لأول مرة للقارئ ، ........و سوف نصحب القارئ ليتعرف عن قرب على هؤلاء الكتاب مع التأكيد على أن هذه ليست محاولة للتنظير للكتابة الجديدة في مصر ، أو لتبني أصوات بعينها في مواجهة أخرى ، إنما فقط مواصلة لما تقوم به الجريدة من لفت الإنتباه إلى الأصوات المميزة في المشهد الأدبي الراهن .. ذلك المشهد الصاخب الذي يحتاج مزيدا من الوقت قبل إصدار أحكام قاطعة بشأنه لأن ملامحه ما تزال في طور التكوين


عموما مش عايز أطول عليكو أكتر من كده ..و بدعوكم لقراءة الملف كاملا في جريدة أخبار الأدب .. أو متابعته على موقع الجريدة على الإنترنت

9 comments:

vision said...

مدونه خطيره...لا بجد حلوه اوى ولسه مكملتش قرايه فيها مواضيع ميتشبعش منها

Mony The Angel said...

far7ana ennak far7aan :)))

محمد عز الدين said...

أنا عن نفسي
عارف إن باسم شرف و محمد صلاح العذب
مبدعين رائعين
زيك تمام
وكمان في مبدعين تانيين
يستحقوا المتابعة
زي سالم الشهباني وجمال فتحي و محمد كمال
وناس تانية كتير
بس عالعموم أنا سعيد باهتمامك
واعتقد ان الاسماء اللي انا ماقرتلهاش
من اللي انت كاتب عنهم
هحاول اقرالهم بجدية
لأني بثق في رأيك الفني
تحياتي

باسم شرف said...

اشكرك بشدة يا طروووووق
وانا مثلك كم سعدت بهذا الملف الادبي
وسعدت بكل ما كتب

انت كاتب جميل انسانيا يا طارق وطبعا فنيا دي حاجة مفهاش كلام

محمود عزت said...

اللملف ده كان قبلة صباحية بعد صلاة الجمعة
فرحت بيه جدا
وإنت يا طارق مجموعتك الجديدة حتنزل إمتى ؟
و قولي بس إنت بتتقابلوا إمتى و فين و انا بإذن الله أكون موجود , أكيد عارف إن تلميذ زيي على طول وقته مربوط بالكلية و بالواجب :))

إبـراهيم ... said...

الجميـــل ، والكاتب المبدع طارق إمام ....
حلووو قوووي ، فرحت بصراحة لفرحتـك ، ولأن العزب و الفخراني يظهروا بكل الجمال ده ( وإنتا وباسم على فكرة) اللي تستحقوه ف أخبار الأدب ....


وبإذن الله هروح أشتري شريعة القط إنهاردة كماااان


وبالتوفيق يااارب دايمًا

KING TOOOT said...

ياريت دايما يكون فيه فرص للمبدعين و يتفتح ليهم المجال للإبداع و تقديم فن محترم و جميل
مبروك للجميع و مع خالص تحياتي و أمنياتي الصادقة بالتوفيق
KING TOOOT

Anonymous said...

روايه الكاتب السيناوى جميله جدا انا قريتها وهو فعلا مبدع ياريت ياجماعه تقروها وطبعا العزب مافيش كلام عليها وانت ياطارق انسان جميل

Millwork Mountain View said...

Grreat blog I enjoyed reading