Thursday, August 21, 2008

طعم الحاجات بيعيش ساعات .. و يدوب قوام .. و قوام يفوت


حاجات كتير حصلت و ماكتبتش عنها هنا

عيد ميلادي فات

الناس هنُّوني و انا ما هنِّتش نفسي

3 ،، 4 ندوات لكتابي

حبيت و كرهت

كتبت في جرايد ومجلات

و اتحبيت تاني من بنات

مابقتش ملاحق ع الدنيا

و كل ما ابص على الآخرة على سبيل التغيير

اكتشف ان فيه ناس برضه مش ملاحقين عليها

مات يوسف شاهين

و رؤوف عباس

و عبدالوهاب المسيري

و محمود درويش

مين يزود ؟؟

تامر نزل شريط

و حماقي حصله

و هيثم شاكر زعلان

الأهلي لسه بيكسب

بس بقى بيخسر برضه

أختي سارة حامل في السادس

خلاص هبقى خال

عقبال ماابقى أب

يا رب

(:


كل مااجي أكتب هنا

ألاقي حاجات محتاجها البيت

و اللي يحتاجه البيت يحرم ع البلوج

شغل مطلوب في المجلة و كام جرنان

حاجة جديدة بعافر في كتابتها

واحدة بقابلها دايما من غير معاد

وواحدة كل ما اديلها معاد ما اروحش

صحاب ع القهوة

بقيت بقابل القهوة أكتر ما بقابلهم

طب اكتب عن إيه ولا إيه ؟

عيد ميلادي .. و عدَّى

اللي ماتوا .. عدُّوا

إيدي ع الكيبورد مش مطاوعاني

عموماً

سامحوني

والله العظيم أنا عامل زي عملة فضة

بترن قوي

لكن ما حادش عارف مكانها بالظبط

و خصوصاً

أنا

(:

12 comments:

هبة ربيع said...

زي عملة فضة ..طيب ملك والا كتابة ؟ ، ركز شوية يا طارق ، عايزين نفرح بيك بقى ، وبعدين يارا (بنت ليلى ونائل) كل شوية تسألني ؤمال عمو طارق فين ما بجيش ليه ،
:DDD
كل سنة وانت طيب ولو انها متأخرة شوية

طارق إمام said...

هبة
ازيك
(:
انا مركز حاليا في الكتابة أكتر
و ما حبش تكون ليا بنت زي يارا
لإن أخلاقها مش كويسة
طالعة لامها
(:
وحشاني جدا و الله
ودايما بالصحة و السلامة يا جميل

Ahmad Abdulatif said...

طارق
أنت تعيش في متاهة ، وربما تستمتع بها ، وربما هذه المتاهة هي التي تأخذ بيدك للاستقرار .
باهنيك علي عيد ميلادك ، وباهنيك علي المعافرة ، وأشوفك قريب .آه بالمناسبة ، مبروك انك حتبقي خال أنا عايز اقول لك اني بقيت خلاص ، جد ، بس غصب عني طبعا ، لان اخواتي اكبر مني بكتير .

r said...

انا شايفه انه مش مهم الحاجات تفوتك وما تلاحظها بس المهم تعرف انها فعلا حصلتللك
حتى لو اكتشفتها او شفتها بعدين المهم احساسك بيها يكون موجود فعلا

والعمله اللى بترن متهيألى مش مهم انها ترن قد ما مهم انها تكون بفايده فعلا
وتوصل لمكانها اللى لازم تتحط فيه
طارق انت كاتب مختلف ودا المميز فيك
رتب نفسك واللى جواكوالحياه هتلاقيها مترتبه طبيعى جدا حواليك

Amr Khater said...

yah a5eran katabt 7aga gdeeda
allah ykoon f 3onak ya tar2 walahy ana ba7ebak gedan w mo3gab gedan bktabatak w t2der t2ool mot2ther beha shwaia f taree2ty ana 3reft ktebatak 3an taree2 el dostoor w day5 adawarak 3ala kotob mosh la2y hamoot w ageeb hdoo2 el katala w nefsy a3arf ra2yak f ktebaty w nefsy akoon sadeek leek w ana f3lan sadeek leek 3al facebook bas enta mabtrodsh 3alia feeh w asef eny tawlet 3aleek w asef eny baktb franko arab bas el keybord mafehash 7roof 3araby
link el blog bta3ty ya reet t2oly r2yek
http://dairet-elre7la.blogspot.com/
w da emaily
amrkhater@live.com

إبـراهيم ... said...

حلووو قوووي يا طارق

وجميـــــــل


كل سنة وإنتا أحلى، وأجمل

أعتقد محدش قالها لك متأخـر كده :)

Anonymous said...

happybirhtday and u just need timeout and u have to breakaway alittle bite and u well be just fine (مئه عام من العزله )

مصطفى محمد said...

:)
و كل سنة و انت زي ما انت عايز

Anonymous said...

انا بدأت اقراك متأخر شوية عن الي سبقوني..مش هعلق علي شغلك الادبي لان علق قبلي كتير ناس يتفهم اكتر و لو اني ؛يعني ساعات بقرا حاجات بالاجبار عشان طبيعة شغلي ؛لكن معاك الموضوع اختلف شوية..
المهم انا عايز اقولك اني متابعة تدويناتك و يمكن عمري ما علقت عليها؛عشان مش حابة اقول اي كلام و خلاص..بس انت خلتني افتح مدونتك زي ما بافتح مواقع يومية كتير؛ و تدويناتك الشخصية بقف عندها كتير اوي..بس :)
بالتوفيق دايما
انت ممكن تقرا الكومنت ده ؛ مش لازم تنشره..ده ليك مش للنشر :))

شادي أصلان said...

يانهار ابيض ياعم طارق

بقي هو دا ينفع

بجد البوست دا فاجر

ايوة فاجر

كل سنة وانت طيب يامعلم

Mony The Angel said...

b2aly kteer gedan ma2rtsh post leek feeh kalam :D

kalam msh 7ekaiat :)

w kalam msh a5baar :))

mabsoota awe bel post da

sa7ee7 enta kda b2a 3ndak kam sana ;)) ?

حمادة زيدان said...

طارق

مش عارف اقولك كل سنة وانت طيب مع انها متأخرة جدا .... ولا أقولك البقاء لله مع انها بردوا متأخرة ... ولا أقولك مبروك ع الرواية ... مش عارف بالظبط كل اللي عاوز قوله

أني من أشد معجبينك

حمادة زيدان